जाने तू या जानेना.. (भाग १)

#जानेतूयाजानेना

भाग १

ही गोष्ट आहे जय आणि अदितीची..
जय-अदिती म्हंटल्यावर एकदम जाने तू या जाने ना आठवलं का..?
छे छे…नाव तसं असलं तरी हे दोघे वेगळे आहेत बरं..आणि खास मित्र वगैरे अजिबातच नाही..दोघांची साधी ओळखही नसते!
पण परिस्थिती दोघांना एकमेकांसमोर आणते…
कशी..? चला बघूया..!

तर ही गोष्ट आहे जय आणि अदितीची..
आता बघूया ह्यांची ओळख कशी झाली!
जयचा यार मानस आणि अदितीची मैत्रीण मुग्धा ह्यांचं लग्न ठरलेलं असतं..
मानस आणि मुग्धाच्या pre wedding पार्टी साठी दोघांच्या मित्रांनी लोणावळ्यात मिळून एक फार्म हाऊस बुक केलेलं असतं..
ती पार्टी ऑर्गनाइझ करण्यात मुख्य हात असतो तो मानसचा खास मित्र जय आणि मुग्धाची जवळची मैत्रीण अदिती यांचा..दोघेजण आपल्या व्यापातून वेळ काढून फोन, whatsapp, ई-मेल, फेसबुकच्या माध्यमातून सगळं ठरवत असतात..

अदितीकडे खूप सुंदर आयडिया असतात पण त्या पूर्ण करण्याचं कौशल्य मात्र नसतं..आणि जय आयडिया वगरे विचार करण्याच्या भानगडीत न पडणारा माणूस, किंबहुना त्याला तितका वेळच नसतो! पण हे-हे असं-असं करुन हवंय असं सांगितलं की ते चोख पार पडणारा..
सुरवातीला जयला वाटलं अदितीला काहीच कळत नाही तर कशाला या भानगडीत पडायचं आणि इकडे अदितीला वाटायचं की हा इतका निरस माणूस आहे तर याने का या भानगडीत पडावं..
पण दोघांच्या मित्रांसाठी करायचं अशा विचाराने दोघे प्रयत्न करत होते..शेवटी अदिती प्लॅन करते आणि जयला सांगते..जयला तो आवडतो आणि  तो पूर्ण करण्याची जबाबदारी घेतो..!
अदिती काय आणि कसं हवंय ते वेळोवेळी सांगत असते आणि जय त्याप्रमाणे जुळवून आणत असतो…पण अद्यापही त्यांची भेट झालेलीच नसते..सगळं काय ते फोनवरच सुरु असतं..
आणि शेवटी तो दिवस उजडतो...

तीन गाड्या करुन सगळ्यांनी लोणावळ्याला पोहोचायचं ठरलेलं असतं..त्याप्रमाणे जय त्याच्या ग्रुप बरोबर एका गाडीत, अदिती तिच्या ग्रुप बरोबर एका गाडीत आणि मानस-मुग्धा आणि त्यांचे भाऊ-बहिणी एका गाडीत असे सगळे आपापल्या ठरलेल्या ठिकाणाहून लोणावळ्याकडे निघतात..

अदितीला तयारी आणि काही शेवटी राहिलेलं सामान घेऊन निघायला उशीर होतो..तिला धड तयारही होता येत नाही..ती तशीच कामाच्या गडबडीत निघते..

इकडे जयने बुकिंग केलेलं असल्याने तो सगळ्यात आधी निघालेला असतो आणि त्याप्रमाणे तोच आधी पोहोचतो..आणि जागेचा ताबा घेतो..त्यांच्या नंतर थोड्याच वेळात मानस-मुग्धा सुद्धा पोहोचतात..
पण अद्याप अदितीचा पत्ताच नसतो..!

जयची नुसती चिडचिड होत असते..कारण तो टीपीकल अप-टू-डेट असणारा..कडक इस्त्रीचे कपडे घालणारा..रे-बॅनचा गॉगल सतत डोळ्यांवर लावणारा..क्लीन शेव आणि वेल ग्रूम्ड हेअर..आणि कायम वेळेत पोहोचणारा असा उमदा टॉल-फेअर-हँडसम महत्वाकांक्षी कॉर्पोरेट मुलगा असतो..
शेवटी वैतागून तो अदितीला फोन करतो..तर तिला पत्ता सापडत नाही असं म्हणते..हे ऐकून जय आणखीनच वैतागतो..
कारण आदितीनेच हट्टाने निसर्गरम्य जागी फार्महाऊस हवं असं सांगितलेलं असतं..आणि तिचं ऐकून जयने ही जागा ठरवलेली असते..त्याचं लोकेशन पाठवलेलं असतं..तरी व्यर्थ!
शेवटी तो फोन दुसऱ्या कोणालातरी द्यायला सांगतो आणि तिच्या मित्राला पत्ता नीट सांगतो आणि तो स्वतः बाहेर मेन रोडला जाऊन उभा रहातो..
शेवटी एकदाचा पत्ता सापडून अदितीच्या ग्रुपची गाडी पोहोचते..
बाहेर जय दिसतो आणि खुणेनेच गाडी आत घ्यायला सांगतो आणि तो चालत जातो..

क्रमशः

- कांचन लेले